Aukakrónuhlaup Ármanns sem var jafnframt Íslandsmeistaramót í 10 km hlaupi fór fram við glæsilegar aðstæður miðvikudaginn 2. júlí s.l. Hlaupið byrjaði og endaði fyrir framan nýjar höfuðstöðvar Landsbankans við Hörputorg enda er bankinn nýr styrktaraðili hlaupsins. Metþátttaka var í hlaupinu að þessu sinni en tæplega 500 manns höfðu skráð sig til leiks. Frjálsíþróttadeild Ármanns sá um framkvæmd hlaupsins og tóku tæp 50 sjálfboðaliðar þátt í því að sjá til þess að allt gengi vel fyrir sig.

Sigurvegari hlaupsins varð Stefán Pálsson sem hljóp fyrir Ármann og setti nýtt aldursflokkamet í flokki karla 35-39 ára þegar hann hljóp á tímanum 31:28 mín. Í kvennaflokki sigraði Andrea Kolbeinsdóttir frá ÍR á tímanum 34:06 mín. 

Fleiri Ármenningar tóku þátt í hlaupinu og má þar nefna Ástu Sif Hinriksdóttur sem náði 2. sæti í flokki 15 ára stúlkna og Ívar Jósafatsson sem náði sömuleiðis 2. sæti í sínum aldursflokki, 60-64 ára karla.